Gelzenkirxenning «Shalke» klubi 40 yoshli markaziy hujumchi Edin Jeko borasidagi rejalarini belgilab oldi. Bu haqda insayder Nikolo Skira ijtimoiy tarmoqlar orqali xabar berdi.

Jurnalistning ma’lumotiga ko‘ra, Bundesligaga qaytishni muddatidan oldin ta’minlagan nemis klubi bosniyalik faxriyni keyingi mavsum uchun ham jamoada saqlab qolishga qaror qilgan. «Kobalt ranglilar» futbolchi bilan hamkorlikni 2027 yilning yoziga qadar uzaytirishni istamoqda.

Jeko jamoaga 2026 yilning yanvar oyida kelib qo‘shilgan edi. Joriy mavsumda hujumchi 6 ta uchrashuvda ishtirok etib, o‘z hisobiga 6 ta gol va 3 ta golli uzatmani yozdirib qo‘yishga ulgurdi. «Shalke» mavsum yakunlanishiga ikki tur qolganda Ikkinchi Bundesliga jadvalida peshqadamlik qilmoqda va eng yaqin ta’qibchisini 8 ochkoga ortda qoldirgan.