Londonning «Arsenal» klubi vingeri Bukayo Saka Chempionlar ligasi finalida qaysi raqib bilan to‘qnash kelishni afzal ko‘rishi haqidagi savolga javob berdi. Seshanba kuni «kanonirlar» Madridning «Atletiko» jamoasi ustidan g‘alaba qozonib, ilk finalchiga aylanishdi. Ikkinchi yo‘llanma esa chorshanba kuni «Bavariya» va «PSJ» o‘rtasidagi bahsda o‘ynaladi.
— Finalda kim bilan to‘qnash kelishni istagan bo‘larding? — deya Mayka Richards CBS Sports studiyasida Sakaga savol berdi.
— Siz mendan buni so‘ray olmaysiz! Bilasiz-ku, men baribir qolipdagi (standart) javobni berishga majburman. Lekin qalbimizning tub-tubida kim bilan o‘ynashni istayotganimizni o‘zingiz yaxshi bilasiz... Bu men ayta oladigan bor gap, — deya javob qaytardi yarim final javob uchrashuvida yagona gol muallifi bo‘lgan Bukayo.
