Madridning «Atletiko» klubi bosh murabbiyi Diyego Simeone jamoasining joriy Chempionlar ligasidagi ishtirokini yuqori baholadi. «Matraschilar» yarim finalda Londonning «Arsenal» klubiga imkoniyatni boy berib, musobaqadagi ishtiroklarini yakunlashdi. Dastlabki uchrashuv 1:1 hisobidagi durang bilan tugagan bo‘lsa, Angliyada «kanonirlar» minimal hisobda zafar quchishdi.
«Biz ham 1/4 finalda «Barselona»ga qarshi, ham yarim finalda «Arsenal»ga qarshi munosib kurashdik. Jamoamiz ajoyib o‘yin ko‘rsatdi — bu barcha futbolchilarning qattiq mehnati natijasidir. Antuan Grizmann juda yaxshi harakat qildi, Koke esa shunchaki ishonib bo‘lmas darajada o‘ynadi, u haqiqiy mahorat sohibi va yetakchi. Umid qilamanki, muxlislar so‘nggi o‘yinlardagi harakatlarimizni munosib baholashdi. Men bu yerda ishlayotganimdan faxrlanaman», — deya Simeonening so‘zlarini keltiradi UYEFA.
