Мадриднинг «Атлетико» клуби бош мураббийи Диего Симеоне жамоасининг жорий Чемпионлар лигасидаги иштирокини юқори баҳолади. «Матрасчилар» ярим финалда Лондоннинг «Арсенал» клубига имкониятни бой бериб, мусобақадаги иштирокларини якунлашди. Дастлабки учрашув 1:1 ҳисобидаги дуранг билан тугаган бўлса, Англияда «канонирлар» минимал ҳисобда зафар қучишди.
«Биз ҳам 1/4 финалда «Барселона»га қарши, ҳам ярим финалда «Арсенал»га қарши муносиб курашдик. Жамоамиз ажойиб ўйин кўрсатди — бу барча футболчиларнинг қаттиқ меҳнати натижасидир. Антуан Гризманн жуда яхши ҳаракат қилди, Коке эса шунчаки ишониб бўлмас даражада ўйнади, у ҳақиқий маҳорат соҳиби ва етакчи. Умид қиламанки, мухлислар сўнгги ўйинлардаги ҳаракатларимизни муносиб баҳолашди. Мен бу ерда ишлаётганимдан фахрланаман», — дея Симеоненинг сўзларини келтиради УЕФА.
