Aprel oyi oxirida yarim himoyachi Kobbi Maynu «Manchester Yunayted» bilan yangi shartnoma imzoladi. 21 yoshli futbolchining kelishuvi 2031 yilga qadar uzaytirildi.

Jurnalist Kris Uilerning ma’lumotlariga ko‘ra, istiqbolli xavbek atrofidagi vaziyatni boshqa klublar, jumladan, Londonning «Arsenal» jamoasi ham diqqat bilan kuzatib borgan. «Kanonirlar» futbolchi uchun asosiy da’vogarlardan biri hisoblanar edi, biroq «qizil iblislar» bilan yangi shartnoma imzolangani e’lon qilingach, tabiiyki, qiziqish susaydi.

Maynu Ruben Amorim davrida asosiy tarkibdagi o‘rnini yo‘qotgan edi, shu sababli ma’lum vaqt uning jamoadan ketishi ehtimoli ancha yuqori tuyulgandi. Portugaliyalik mutaxassis iste’foga chiqarilib, Maykl Karrik tayinlanganidan so‘ng, chiqib kelayotgan yulduz uchun asosiy tarkibda yana joy topildi.