Unai Emeri murabbiylik faoliyatida oltinchi bor Yevropa Ligasi finaliga chiqdi. Ispaniyalik mutaxassis qo‘l ostidagi «Aston Villa» turnir yarim finalining javob uchrashuvida «Nottingem Forest»ni tor-mor etdi (4:0, birinchi o‘yin — 0:1) va keyingi bosqichga yo‘l oldi.
Eslatib o‘tamiz, 2014 yildan 2016 yilgacha bo‘lgan davrda «Sevilya» Emeri boshqaruvida ketma-ket uch marta ushbu kubok sohibiga aylangan edi. 2019 yilda Unai boshchiligidagi «Arsenal» finalga chiqib, unda «Chelsi»ga imkoniyatni boy bergan (1:4). 2021 yilda esa «Spartak»ning sobiq murabbiyi «Vilyarreal» ustozi sifatida Yevropa Ligasida g‘olib chiqdi.
Yevropa Ligasining joriy mavsumi hal qiluvchi bahsida «Aston Villa» «Frayburg» bilan to‘qnash keladi. Uchrashuv 20 may kuni bo‘lib o‘tadi.













