Yakshanba, 10 may kuni Ispaniya chempionatining 35-turi doirasida «Barselona» o‘z maydonida Madridning «Real» klubini qabul qiladi. «Ko‘k-anorranglilar» markaziy yarim himoyachisi Mark Kasado «el-klasiko»dan nimalar kutayotgani bilan o‘rtoqlashdi.
«Eng muhimi, murabbiyimiz aytganidek — chempionatda g‘olib chiqish. Qayerda, qachon va qanday bo‘lishining ahamiyati yo‘q. Lekin shunisi aniqki, ham jamoa uchun, ham muxlislar uchun bu ishni aynan «Real»ga qarshi o‘yinda, o‘z uyinida, ishqibozlarimiz bilan birgalikda amalga oshirish juda yoqimli bo‘lardi. Bu juda chiroyli voqea bo‘lgan bo‘lardi», — deya xavbekning so‘zlarini keltiradi Diario Sport.
Ayni damda Xans-Diter Flik shogirdlari «qaymoqranglilar»ni 11 ochkoga ortda qoldirmoqda. Ispaniya chempionati yakuniga to‘rtta tur qoldi.
