«Manchester Siti» himoyachisi Yoshko Gvardiol faoliyatini yana Germaniya Bundesligasida davom ettirishi mumkin. Jurnalist Grem Beyli bergan ma’lumotlarga ko‘ra, Myunxenning «Bavariya» klubi xorvatiyalik futbolchini shu yozda sotib olish variantini ko‘rib chiqmoqda.
Germaniya chempionlari tez orada futbolchining transferi bo‘yicha rasmiy taklif tayyorlashga tayyor. Eslatib o‘tamiz, Gvardiol shu yilning yanvar oyida «Chelsi»ga qarshi kechgan bahsda o‘ng oyog‘idan og‘ir jarohat olib, operasiya qilingan edi. U yaqin kunlardagina individual dastur asosida mashg‘ulotlarga qaytdi.
Ma’lumot uchun, Yoshko Gvardiol 2023 yilda «RB Leypsig»dan 90 million yevro evaziga «shaharliklar» safiga o‘tgan edi. Uning ingliz klubi bilan amaldagi shartnomasi 2028 yilning 30 iyuniga qadar mo‘ljallangan. Joriy mavsumda himoyachi «Manchester Siti» safida barcha musobaqalarda 23 ta o‘yinda maydonga tushib, 2 ta gol va 5 ta golli uzatmaga mualliflik qildi.
