«Манчестер Сити» ҳимоячиси Йошко Гвардиол фаолиятини яна Германия Бундеслигасида давом эттириши мумкин. Журналист Грэм Бэйли берган маълумотларга кўра, Мюнхеннинг «Бавария» клуби хорватиялик футболчини шу ёзда сотиб олиш вариантини кўриб чиқмоқда.

Германия чемпионлари тез орада футболчининг трансфери бўйича расмий таклиф тайёрлашга тайёр. Эслатиб ўтамиз, Гвардиол шу йилнинг январь ойида «Челси»га қарши кечган баҳсда ўнг оёғидан оғир жароҳат олиб, операция қилинган эди. У яқин кунлардагина индивидуал дастур асосида машғулотларга қайтди.

Маълумот учун, Йошко Гвардиол 2023 йилда «РБ Лейпциг»дан 90 миллион евро эвазига «шаҳарликлар» сафига ўтган эди. Унинг инглиз клуби билан амалдаги шартномаси 2028 йилнинг 30 июнига қадар мўлжалланган. Жорий мавсумда ҳимоячи «Манчестер Сити» сафида барча мусобақаларда 23 та ўйинда майдонга тушиб, 2 та гол ва 5 та голли узатмага муаллифлик қилди.