Madridning «Real» klubi sobiq yarim himoyachisi Mesut O‘zil 2010 yilda «El-Klasiko»da qayd etilgan sharmandali mag‘lubiyatdan so‘ng kiyinish xonasida nimalar sodir bo‘lganini so‘zlab berdi.

«Biz «Barselona»ga 0:5 hisobida yutqazgandik. Kiyinish xonasida hammamiz Mourinyo hozir g‘azabdan portlasa kerak, deb o‘ylagandik. Ammo u kirib keldi va hammamizga: «Boshingizni ko‘taring, men — Joze Mourinyoman. Kelasi yili biz ularni yer tishlatamiz», dedi. Yakunda xuddi u aytganidek bo‘ldi», — deya O‘zilning so‘zlarini keltirmoqda Vav TV.

Eslatib o‘tamiz, «Real» 2010 yilning 29 noyabrida «Kamp Nou»da kechgan bahsda 0:5 hisobida mag‘lub bo‘lgan edi. Ertaga, 10 may kuni Ispaniya chempionati doirasida navbatdagi «El-Klasiko» bo‘lib o‘tadi. Ushbu o‘yinda «Barselona» g‘alaba qozonsa, muddatidan oldin chempionlikni rasmiylashtirishi mumkin.