Мадриднинг «Реал» клуби собиқ ярим ҳимоячиси Месут Ўзил 2010 йилда «Эл-Класико»да қайд этилган шармандали мағлубиятдан сўнг кийиниш хонасида нималар содир бўлганини сўзлаб берди.

«Биз «Барселона»га 0:5 ҳисобида ютқазгандик. Кийиниш хонасида ҳаммамиз Моуриньо ҳозир ғазабдан портласа керак, деб ўйлагандик. Аммо у кириб келди ва ҳаммамизга: «Бошингизни кўтаринг, мен — Жозе Моуриньоман. Келаси йили биз уларни ер тишлатамиз», деди. Якунда худди у айтганидек бўлди», — дея Ўзилнинг сўзларини келтирмоқда Vav TV.

Эслатиб ўтамиз, «Реал» 2010 йилнинг 29 ноябрида «Камп Ноу»да кечган баҳсда 0:5 ҳисобида мағлуб бўлган эди. Эртага, 10 май куни Испания чемпионати доирасида навбатдаги «Эл-Класико» бўлиб ўтади. Ушбу ўйинда «Барселона» ғалаба қозонса, муддатидан олдин чемпионликни расмийлаштириши мумкин.