Madridning «Real» klubi sobiq yulduzi Luish Figu hujumchi Kilian Mbappening «qirollik klubi»dagi ilk mavsumi haqida o‘z fikrlarini bildirdi.

«Kilian hamon dunyoning eng kuchli futbolchilari qatorida qolmoqda. Uning joriy mavsumdagi gollari soni hayratlanarli darajada. Biroq jamoaviy natija ham muhim. Agar «Real» shuncha gollar bilan birga sovrinlarni ham qo‘lga kiritganida edi, Mbappening o‘yiniga berilayotgan baho butunlay boshqacha bo‘lardi.

To‘g‘ri, Madriddagi debyut mavsumini u biroz beqaror boshladi. Bu tabiiy, chunki u yangi muhit va boshqa chempionatga moslashishi kerak edi. Shunga qaramay, menimcha, u o‘zidan kutilgan darajada harakat qilmoqda», — deya Figuning so‘zlarini keltirmoqda Flashscore nashri.

Ma’lumot uchun, fransiyalik yulduz joriy mavsumda «qaymoqranglilar» safida barcha musobaqalarda 41 ta o‘yinda maydonga tushib, o‘z hisobiga 41 ta gol va 6 ta golli uzatmani yozdirib qo‘ydi.