Ispaniya La Ligasining 35-turi doirasida bo‘lib o‘tadigan «Barselona» va «Real Madrid» jamoalari o‘rtasidagi markaziy o‘yin oldidan klub rahbarlarining uchrashuvi bo‘lib o‘tmaydigan bo‘ldi. Bu haqda Marca nashri xabar bermoqda.
Ma’lumotlarga ko‘ra, har ikki klub prezidentlari — Florentino Peres va Joan Laporta o‘rtasidagi an’anaviy tushlik tashkil etilmaydi. Bundan tashqari, «Real» prezidentining bugungi bahs uchun «Kamp Nou» stadioniga tashrif buyurmasligi haqida ham xabarlar tarqalgan.
Ta’kidlanishicha, klublar o‘rtasidagi bunday rasmiy tadbirlar 2023 yildan buyon o‘tkazilmay kelmoqda. Bunga «Barselona»ning hakamlar qo‘mitasi sobiq vise-prezidenti Xose Mariya Enrikes Negreyra ishi bo‘yicha ayblanayotgani va ushbu sud jarayonida «Real»ning xususiy ayblovchi sifatida ishtirok etayotgani sabab bo‘lgan. Mazkur voqealar ikki grand klub o‘rtasidagi munosabatlarning sezilarli darajada sovuqlashishiga olib keldi.
Eslatib o‘tamiz, «El-Klasiko» bugun Toshkent vaqti bilan soat 00:00 da boshlanadi.
