Испания Ла Лигасининг 35-тури доирасида бўлиб ўтадиган «Барселона» ва «Реал Мадрид» жамоалари ўртасидаги марказий ўйин олдидан клуб раҳбарларининг учрашуви бўлиб ўтмайдиган бўлди. Бу ҳақда Marca нашри хабар бермоқда.
Маълумотларга кўра, ҳар икки клуб президентлари — Флорентино Перес ва Жоан Лапорта ўртасидаги анъанавий тушлик ташкил этилмайди. Бундан ташқари, «Реал» президентининг бугунги баҳс учун «Камп Ноу» стадионига ташриф буюрмаслиги ҳақида ҳам хабарлар тарқалган.
Таъкидланишича, клублар ўртасидаги бундай расмий тадбирлар 2023 йилдан буён ўтказилмай келмоқда. Бунга «Барселона»нинг ҳакамлар қўмитаси собиқ вице-президенти Хосе Мария Энрикес Негрейра иши бўйича айбланаётгани ва ушбу суд жараёнида «Реал»нинг хусусий айбловчи сифатида иштирок этаётгани сабаб бўлган. Мазкур воқеалар икки гранд клуб ўртасидаги муносабатларнинг сезиларли даражада совуқлашишига олиб келди.
Эслатиб ўтамиз, «Эл-Класико» бугун Тошкент вақти билан соат 00:00 да бошланади.
