Sardiniyada o‘tayotgan turnir shaxmat olamiga yangi rekordchini taqdim etdi. Argentinalik 12 yoshli Faustino Oro grossmeysterlik unvoni uchun so‘nggi, uchinchi normani muddatidan oldin bajardi.

Qiziqarli tomoni shundaki, so‘nggi tur oldidan Faustinoning hisobida 8 imkoniyatdan 6 ochko bor edi va oxirgi normani olish uchun u so‘nggi turda durang o‘ynashi shart edi. Biroq qur’aga ko‘ra, u so‘nggi turda turnirning asosiy favoriti Yan Nepomnyashiy (2729) bilan to‘qnash keladigan bo‘ldi.

Raqibning reytingi o‘ta yuqoriligi sababli, Faustino hatto bu partiyada mag‘lub bo‘lgan taqdirda ham, uning turnirdagi o‘rtacha ko‘rsatkichi (TPR) 2600 dan pastga tushmaydi. Bu esa avtomatik ravishda grossmeysterlik normasi bajarilganini anglatadi!

Shunday qilib, Faustino Oro 12 yosh 6 oy va 26 kunligida grossmeyster unvoniga erishdi. Bu shaxmat tarixidagi ikkinchi eng yaxshi natija hisoblanadi. U 1-o‘rinda turgan Abhimanyu Mishradan bor-yo‘g‘i ikki oyga ortda qoldi.