«Tottenxem» bosh murabbiyi Roberto De Dzerbi APLning 36-turida «Lids» bilan qayd etilgan durang (1:1) haqida o‘z fikrlarini bildirib o‘tdi.
Ushbu natijadan so‘ng «shporlar» xavfli hududda borayotgan va 18-o‘rinni egallab turgan «Vest Xem»dan 2 ochkoga ilgarilab ketishdi. De Dzerbi jamoasi hozirda 17-pog‘onani egallab turibdi.
«Biz yaxshi o‘ynadik, ajoyib emas, lekin bosim juda kuchli edi. Xotirjam harakat qila olmadik.
Tezda g‘alabani qo‘lga kiritishni istagandik. Yakunda shuni tushundimki, biz mavsum oxirigacha kurashishimiz kerak bo‘ladi.
«Lids» yaxshi o‘yin ko‘rsatdi. Umid qilamizki, ular «Vest Xem»ga qarshi ham xuddi shunday o‘ynashadi, chunki shunday qilish kerak.
Belgilangan penaltidan [Telning xatosi tufayli] afsusdaman, chunki bungacha Matis ajoyib gol urgandi. U juda yosh va men uchun bu muammo emas. Uning ishtiyoqi va ruhiyatidan mamnunman.
Biz u qadar sifatli o‘yin ko‘rsata olmadik, lekin ligada jon saqlab qolish uchun kurash mana shunday bo‘ladi — barcha uchrashuvlarni xotirjam o‘tkazib bo‘lmaydi. O‘yinimizni yaxshilashimiz va odatlarimizni o‘zgartirishimiz shart. Jon saqlab qolish uchun kurash Chempionlar ligasi uchun kurashdan farq qiladi», — dedi De Dzerbi.
