«Тоттенхэм» бош мураббийи Роберто Де Дзерби АПЛнинг 36-турида «Лидс» билан қайд этилган дуранг (1:1) ҳақида ўз фикрларини билдириб ўтди.

Ушбу натижадан сўнг «шпорлар» хавфли ҳудудда бораётган ва 18-ўринни эгаллаб турган «Вест Хэм»дан 2 очкога илгарилаб кетишди. Де Дзерби жамоаси ҳозирда 17-поғонани эгаллаб турибди.

«Биз яхши ўйнадик, ажойиб эмас, лекин босим жуда кучли эди. Хотиржам ҳаракат қила олмадик.

Тезда ғалабани қўлга киритишни истагандик. Якунда шуни тушундимки, биз мавсум охиригача курашишимиз керак бўлади.

«Лидс» яхши ўйин кўрсатди. Умид қиламизки, улар «Вест Хэм»га қарши ҳам худди шундай ўйнашади, чунки шундай қилиш керак.

Белгиланган пенальтидан [Телнинг хатоси туфайли] афсусдаман, чунки бунгача Матис ажойиб гол урганди. У жуда ёш ва мен учун бу муаммо эмас. Унинг иштиёқи ва руҳиятидан мамнунман.

Биз у қадар сифатли ўйин кўрсата олмадик, лекин лигада жон сақлаб қолиш учун кураш мана шундай бўлади — барча учрашувларни хотиржам ўтказиб бўлмайди. Ўйинимизни яхшилашимиз ва одатларимизни ўзгартиришимиз шарт. Жон сақлаб қолиш учун кураш Чемпионлар лигаси учун курашдан фарқ қилади», — деди Де Дзерби.