“Arsenal” vingeri Leandro Trossardning shaxsiy hayotida murakkab vaziyat yuzaga keldi. Uning rafiqasi Lora Xilven ijtimoiy tarmoqlardagi sahifalaridan belgiyalik futbolchiga oid barcha postlarini o‘chirib tashladi. Ushbu kutilmagan “tozalash” London klubining Angliya Premyer Ligasi va Chempionlar Ligasi bosh sovrini uchun kurashayotgan eng muhim pallada yuz berdi.

Trossardning oilasi atrofidagi shubha-gumonlar uning rafiqasi Lora Xilven o‘zining Instagram profildagi barcha suratlarni tozalab tashlaganidan keyin yanada kuchaydi. 33 yoshli Lora “Arsenal” yulduzi bilan tushgan har bir suratni, jumladan, to‘y kunidagi unutilmas lahzalar va ta’tildagi ko‘plab xotiralarni o‘chirib yuborgan. Kuzatuvchilarning qayd etishicha, Xilven dekabr oyi boshidan beri nikoh uzugi bilan tushgan birorta ham surat joylamagan, bu esa ularning munosabatlari borasidagi xavotirlarni yanada oshirmoqda.

Deyarli 13 yildan beri birga bo‘lgan va 2019 yilda turmush qurgan ushbu juftlik ilgari internetda bir-birlariga bo‘lgan mehr-muhabbatlarini ochiq namoyish etishi bilan tanilgan edi. Vaziyatdan xabardor manbaning ma’lum qilishicha, munosabatlar keskin o‘zgargan:

“Lora avval Instagram sahifasiga Leandro bilan to‘y kunlari, ta’tillar va uchrashuvlardan juda ko‘p rasmlar joylar edi, biroq hozir ularning barchasini o‘chirib tashladi. Agar kimdir hozir uning profiliga kirsa, ularning turmush qurganini mutlaqo tasavvur qila olmaydi”, deyiladi xabarda.

Ijtimoiy tarmoqdagi ushbu “tozalash” nafaqat oilaviy suratlarni, balki Loraning “Emireyts” stadionida Trossardni qo‘llab-quvvatlab tushgan rasmlarini ham qamrab olgan.

Muxlislar, shuningdek, uning so‘nggi postlarida turmush tarzi o‘zgarganiga ishora qiluvchi holatlarga e’tibor qaratishgan. Joriy yilning 2 mart kuni joylangan suratda uning nikoh uzugi ko‘rinmagan. Bunga qadar u o‘z munosabatlaridagi muhim voqealarni muntazam ravishda sahifasiga joylab borar edi.

Shaxsiy hayotdagi ushbu tartibsizlik Mikel Arteta jamoasi uchun juda noqulay vaqtga to‘g‘ri keldi. Trossard joriy mavsumda “Manchester Siti” bilan Premyer Liga taxti uchun kurashayotgan “Arsenal” tarkibida juda muhim futbolchi bo‘lib kelmoqda. Belgiyalik o‘yinchi “Vest Hem” ustidan qozonilgan 1:0 hisobidagi qiyin g‘alabada hal qiluvchi golni urib, o‘z qiymatini ko‘rsatgan va “kanonirlar”ning chempionlik poygasidagi ustunligini saqlab qolishga yordam bergan edi.

Shaxsiy hayotidagi murakkab vaziyatga qaramay, Trossard o‘zining professional burchiga e’tibor qaratishda davom etmoqda. Shuningdek, u Budapeshtda “Parij Sen-Jermen”ga qarshi bo‘lib o‘tadigan Chempionlar Ligasi finalida ham muhim rol o‘ynashi kutilmoqda.

Ma’lumot uchun, Trossard joriy mavsum “Arsenal” safida barcha musobaqalar doirasida 50 ta uchrashuvda maydonga tushib, 8 ta gol va 9 ta golli uzatmani amalga oshirdi. Transfermarkt portali uning bozor qiymatini 20 million yevroga baholamoqda.