Braziliya futboli afsonasi Kafu tez orada e’lon qilinishi kutilayotgan terma jamoaning JCH-2026 uchun qaydnomasi borasida o‘z fikrlarini bildirdi. Ikki karra jahon chempionining so‘zlariga ko‘ra, bosh murabbiy Karlo Anchelotti tarkib tanlash masalasida ikkilanishlarsiz qaror qabul qilib bo‘lgan.
«Biz Anchelotti bilan ko‘p gaplashamiz. Uning qarori qat’iy va nima kerakligini juda yaxshi biladi. Karlo so‘nggi o‘yinlarga qarab o‘z fikrini o‘zgartirmaydi. U nima qilishni allaqachon bilib qo‘ygan», — deya Kafuning so‘zlarini keltiradi Brasil Football nashri.
Ta’kidlash joizki, Kafu ko‘p yillar oldin «Milan»da aynan italiyalik mutaxassis qo‘l ostida to‘p surgan.
Braziliya terma jamoasi atrofidagi asosiy intrigalardan biri — 2023 yildan beri «pentakampeonlar» safida maydonga tushmagan Neymarning qaytgan-qaytmagani bo‘lib qolmoqda. Yaqinda Anchelottining o‘zi ham 34 yoshli hujumchi borasidagi fikrlari bilan o‘rtoqlashgan edi.
