Бразилия футболи афсонаси Кафу тез орада эълон қилиниши кутилаётган терма жамоанинг ЖЧ-2026 учун қайдномаси борасида ўз фикрларини билдирди. Икки карра жаҳон чемпионининг сўзларига кўра, бош мураббий Карло Анчелотти таркиб танлаш масаласида иккиланишларсиз қарор қабул қилиб бўлган.
«Биз Анчелотти билан кўп гаплашамиз. Унинг қарори қатъий ва нима кераклигини жуда яхши билади. Карло сўнгги ўйинларга қараб ўз фикрини ўзгартирмайди. У нима қилишни аллақачон билиб қўйган», — дея Кафунинг сўзларини келтиради Brasil Football нашри.
Таъкидлаш жоизки, Кафу кўп йиллар олдин «Милан»да айнан италиялик мутахассис қўл остида тўп сурган.
Бразилия терма жамоаси атрофидаги асосий интригалардан бири — 2023 йилдан бери «пентакампеонлар» сафида майдонга тушмаган Неймарнинг қайтган-қайтмагани бўлиб қолмоқда. Яқинда Анчелоттининг ўзи ҳам 34 ёшли ҳужумчи борасидаги фикрлари билан ўртоқлашган эди.
