«Manchester Siti» bosh murabbiyi Xosep Gvardiola jamoa yarim himoyachisi Rodrining holati haqida gapirib o‘tdi. «Shaharliklar» so‘nggi to‘rtta o‘yinni 29 yoshli futbolchisiz o‘tkazishga majbur bo‘lishdi — u yana jarohat olib, safdan chiqqan.

Jamoa ustozi tayanch yarim himoyachisining yo‘qligi tarkibga qanday ta’sir qilayotgani haqida to‘xtaldi.

«Rodri o‘z sport formasida bo‘lganida, o‘z pozisiyasida dunyoning eng yaxshi futbolchisi hisoblanadi. U bilan jamoa o‘zini ancha ishonchli his qiladi. Biroq hozir Kovachich safga qaytmoqda, shuningdek, Niko Gonsales ham bizga juda katta yordam beryapti. O‘tgan bahsda Bernardu Silva o‘zini har tomonlama ko‘rsata oldi. Men bundan juda mamnunman», — dedi Gvardiola matbuot anjumanida.

Eslatib o‘tamiz, bugun «Manchester Siti» o‘z maydonida «Kristal Pelas»ni qabul qiladi. Uchrashuv Toshkent vaqti bilan soat 00:00 da boshlanadi.