«Manchester Yunayted» afsonasi Pol Skoulz Premyer-liganing joriy mavsumidagi eng yaxshi o‘yinchi borasidagi fikrlari bilan o‘rtoqlashdi. Yaqinda ushbu sovrinni «qizil iblislar» yarim himoyachisi Brunu Fernandesh qo‘lga kiritgan bo‘lsa-da, Skoulzning o‘z nomzodi bor.
«Men Gabriel (Magalyaes)ni tanlagan bo‘lardim. Menimcha, u joriy mavsumda «Arsenal»ning eng yaxshi futbolchisi bo‘ldi. Ko‘pchilik Deklan Rays haqida gapirmoqda, ammo menimcha, u sovringa loyiq bo‘lish uchun yetarlicha ish qilgani yo‘q. Ha, balki Brunu hammadan yaxshiroq o‘ynagandir, lekin «Arsenal» ligada peshqadamlik qilmoqda, shu bois Gabriel ham bu e’tirofga loyiq», — deya Skoulzning so‘zlarini keltirmoqda ingliz OAVlari.
Ma’lumot uchun, Gabriel dos Santos APLning joriy mavsumida «kanonirlar» safida 30 ta uchrashuvda maydonga tushib, 3 ta gol va 4 ta golli uzatmani o‘z hisobiga yozib qo‘ygan.
