Madridning «Real» klubi sobiq yarim himoyachisi Toni Kroos jamoaning yosh iqtidori Arda Gyuler haqida fikr bildirdi. U turkiyalik futbolchi tez orada «qaymoqranglilar»ning asosiy figurasiga aylanishiga ishonmoqda.

«Arda Gyuler — «Real»ning kelajakdagi kalit futbolchisi. U joriy yilda ko‘p o‘yin amaliyotiga ega bo‘ldi va yaqin istiqbolda jamoa uchun juda muhim ahamiyat kasb etadi. Uning uchun eng maqbul pozisiya — darvozaga yaqin bo‘lgan «o‘nlik» roli. Ardada golli uzatma berish qobiliyati yuqori, shu sababli u hujumchilar va vingerlarga yaqinroq o‘ynashi kerak. U sof hujumchi emas, shu bois hujum markazida uning imkoniyatlari cheklanib qoladi. Shu bilan birga, Gyuler maydon chuqurligidan turib ham xavfli vaziyatlar yaratishga qodir», — deya Kroosning so‘zlarini keltiradi Footmercato.

Ma’lumot uchun, Arda Gyuler joriy mavsumda barcha turnirlarda 50 ta uchrashuvda ishtirok etib, o‘z hisobiga 6 ta gol va 14 ta golli uzatmani yozdirib qo‘ydi.

21 yoshli futbolchining «Real» bilan amaldagi shartnomasi 2029 yilning yoziga qadar mo‘ljallangan. Transfermarkt portali turkiyalik yarim himoyachining transfer qiymatini 90 million yevroga baholagan.