Madridning «Real» klubi yozgi transfer oynasi uchun rejalarini tuzishni boshladi. Klubning asosiy maqsadlaridan biri — yarim himoya chizig‘ini kuchaytirish.

ESPN Deportes nashrining xabar berishicha, madridliklarning e’tiborini «PSJ» yulduzi Vitinya tortgan. Biroq «qirollik klubi» rahbariyati 26 yoshli portugaliyalik futbolchini qo‘lga kiritish imkoniyatini «deyarli imkonsiz» deb baholamoqda.

Vitinya ayni damda dunyoning eng kuchli yarim himoyachilaridan biri hisoblanadi. Transfermarkt portali uni 110 million yevroga baholagan bo‘lib, jahonda faqatgina 11 nafar futbolchi undan balandroq narxga ega.

Eslatib o‘tamiz, «Real» uchun joriy mavsum muvaffaqiyatsiz yakunlanmoqda — jamoa birorta ham sovrin yuta olmadi. Shu sababli tarkibni yangilash Madrid klubi uchun ustuvor vazifaga aylangan.