«Liverpul» bosh murabbiyi Arne Slot Muhammad Saloh ertangi «Aston Villa»ga qarshi bahsda ishtirok etishi mumkinligini ma’lum qildi.
Mersisaydliklar vingeri 25 aprel kuni «Kristal Pelas» bilan o‘yinda sonidan jarohat olganidan beri maydonga tushmayotgan edi. Dastlab misrlik futbolchi mavsumning qolgan qismini o‘tkazib yuborishi taxmin qilingandi, biroq uning jarohati jiddiy bo‘lib chiqmadi.
Slotning aytishicha, Saloh atigi bir necha daqiqa o‘ynashga tayyor bo‘ladi, lekin murabbiy uning ertaga maydonga tushishidan umidvor. Shuningdek, murabbiy boshqa o‘yinchilar haqida ham ma’lumot berdi. Konate sog‘ayib, jamoa bilan mashg‘ulot o‘tkazmoqda. Alisson ham mashg‘ulotlarga qaytgan, biroq uning o‘yinga tayyorligi ertaga aniq bo‘ladi. Florian Virs esa ichak infeksiyasi tufayli antibiotiklar ichmoqda va uning maydonga tushishi hozircha so‘roq ostida.
