La Liga prezidenti Xavyer Tebas «Real» klubi «Negreyra ishi» bo‘yicha sud jarayonini ataylab cho‘zayotganini ta’kidladi. Avvalroq Madrid klubi prezidenti Florentino Peres La Ligani ushbu ishda faol emaslikda ayblab, «faqatgina «Real» rasmiy shikoyat kiritdi, La Liga esa sukut saqlamoqda» mazmunida chiqish qilgan edi.

Tebas o‘zining ijtimoiy tarmoqdagi sahifasida bunga keskin javob qaytardi.

«Yolg‘on davom etayotgani uchun yana bir bor tushuntirib o‘taman. Florentino «Real» yagona shikoyatchi bo‘lgani va La Liga hech narsa qilmaganini aytmoqda. Bu — yolg‘on. «Real» birinchi bo‘lib emas, eng oxirgi bo‘lib shikoyat kiritgan. Ungacha La Liga vakili prokuraturada, sudya Estrada Fernandes esa sud zalida chiqish qilgan edi. Buning hujjatlari bor», — deb yozdi Tebas.

Shuningdek, La Liga rahbari «Real»ning bu harakatlarini «Barselona» bilan munosabatlariga bog‘ladi. Uning so‘zlariga ko‘ra, ikki klub Superliga loyihasida «do‘st» bo‘lgan vaqtda Madrid klubi Negreyra masalasida jim turgan.

«Ular boshqa xatolarini yopish uchun «Negreyra ishi»ni cho‘zishda davom etishmoqda. Eslatib o‘taman, «Barselona» Superligada bo‘lgan vaqtda «Real» bu masalada sukut saqlagan. O‘shanda ular Florentino aytganidek «do‘st» edilar. Qachonki «Barselona» Superligani tark etganidan keyingina ularda «g‘urur» uyg‘ondi», — deya qo‘shimcha qildi u.