Ла Лига президенти Хавьер Тебас «Реал» клуби «Негрейра иши» бўйича суд жараёнини атайлаб чўзаётганини таъкидлади. Аввалроқ Мадрид клуби президенти Флорентино Перес Ла Лигани ушбу ишда фаол эмасликда айблаб, «фақатгина «Реал» расмий шикоят киритди, Ла Лига эса сукут сақламоқда» мазмунида чиқиш қилган эди.

Тебас ўзининг ижтимоий тармоқдаги саҳифасида бунга кескин жавоб қайтарди.

«Ёлғон давом этаётгани учун яна бир бор тушунтириб ўтаман. Флорентино «Реал» ягона шикоятчи бўлгани ва Ла Лига ҳеч нарса қилмаганини айтмоқда. Бу — ёлғон. «Реал» биринчи бўлиб эмас, энг охирги бўлиб шикоят киритган. Унгача Ла Лига вакили прокуратурада, судья Эстрада Фернандес эса суд залида чиқиш қилган эди. Бунинг ҳужжатлари бор», — деб ёзди Тебас.

Шунингдек, Ла Лига раҳбари «Реал»нинг бу ҳаракатларини «Барселона» билан муносабатларига боғлади. Унинг сўзларига кўра, икки клуб Суперлига лойиҳасида «дўст» бўлган вақтда Мадрид клуби Негрейра масаласида жим турган.

«Улар бошқа хатоларини ёпиш учун «Негрейра иши»ни чўзишда давом этишмоқда. Эслатиб ўтаман, «Барселона» Суперлигада бўлган вақтда «Реал» бу масалада сукут сақлаган. Ўшанда улар Флорентино айтганидек «дўст» эдилар. Қачонки «Барселона» Суперлигани тарк этганидан кейингина уларда «ғурур» уйғонди», — дея қўшимча қилди у.