Eron terma jamoasining 2026 yilgi futbol bo‘yicha jahon chempionatida ishtirok etishi turnir boshlanishiga 28 kun qolganida xavf ostida qoldi. Bu haqda RMC Sport xabar berdi.
Manba ma’lumotiga ko‘ra, Eron futbol federasiyasi prezidenti Mehdi Toj milliy jamoa a’zolaridan hozirgacha hech biri AQSH vizasini olmaganidan jiddiy xavotir bildirgan. Vaziyat Yaqin Sharqdagi geosiyosiy taranglikning kuchayishi va Tehron hamda Vashington o‘rtasida 1980 yildan buyon diplomatik munosabatlar mavjud emasligi sabab yanada murakkablashmoqda.
Eron futbol federasiyasi rahbari yaqin kunlarda FIFA bilan hal qiluvchi uchrashuv o‘tkazilishini ma’lum qildi. Unda vizalar masalasini hal etish bo‘yicha aniq kafolatlar talab qilinadi.
FIFA prezidenti Janni Infantino Eron terma jamoasi rejaga muvofiq AQSHda o‘yinlarini o‘tkazishini aytgan bo‘lsa-da, hozircha zarur hujjatlarni olish borasida amaliy siljish kuzatilmayapti.
Ta’kidlanishicha 18 may kuni terma jamoa delegasiyasi musobaqa oldidan yig‘inni boshlash uchun Anqaraga yo‘l oladi. Agar kechikishlar davom etsa, Eronning turnirdagi ishtiroki jiddiy xavf ostida qolishi mumkin.
