Milanning «Inter» klubi hujumchisi Markus Tyuram jamoa bilan shartnomasini uzaytirishi mumkin. Jurnalist Nikolo Skiraning xabar berishicha, «neradzurrilar» fransuz futbolchisi bilan yangi mehnat kelishuvi bo‘yicha muzokaralar o‘tkazish niyatida. Amaldagi shartnoma ikki yildan so‘ng o‘z nihoyasiga yetadi.

Joriy mavsum davomida matbuotda 28 yoshli futbolchining jamoadan ketishi mumkinligi haqida tez-tez xabarlar tarqalgan edi. Markus Tyuram Kristian Kivu boshchiligidagi jamoa safida ushbu mavsumda 44 ta o‘yinda maydonga tushib, 18 ta gol urdi va 9 ta golli uzatmani amalga oshirdi.

«Transfermarkt» portali hujumchining narxini 50 million yevroga baholamoqda. Eslatib o‘tamiz, chorshanba kuni futbolchi milanliklar tarkibida Italiya Kubogi g‘olibiga aylandi.