Londonning «Arsenal» klubi himoyachisi Rikkardo Kalafyori «Byornli»ga qarshi bahs oldidan jamoa mashg‘ulotlarida ko‘rinish berdi. O‘tgan turda italiyalik futbolchi jarohat olib, o‘yinni oxirigacha yetkaza olmagan edi.

O‘sha o‘yindan so‘ng bosh murabbiy Mikel Arteta futbolchi nimanidir his qilganini tasdiqlagan, biroq tiklanish muddatlarini ochiqlamagan edi. Payshanba kuni Kalafyori ochiq mashg‘ulotlarda ishtirok etgani ma’lum bo‘ldi, bu esa uning navbatdagi o‘yinda maydonga tushish imkoniyatlarini oshiradi.

Mashg‘ulot jarayonida Vilyam Saliba, Martin Edegor va Bukayo Saka ishtirok etmadi. Ularning har uchalasi alohida tiklanish mashqlarini bajarishdi. «Byornli» bilan o‘yin 18 may kuni bo‘lib o‘tadi. Hozirda «Arsenal» chempionatda «Manchester Siti»dan 2 ochko oldinda bo‘lgan holda peshqadamlik qilmoqda.