O‘zbekiston kubogi 2-turi doirasidagi «Lokomotiv» - «Dinamo» (2:2) uchrashuvidan keyin mehmonlar jamoasi murabbiyi Marat Miftaxutdinov o‘yin borasidagi fikrlarini bildirdi.

«O‘ylaymanki, bugungi bahs muxlislarga yoqdi – ikki tomonlama jangovar o‘yin kechdi. O‘yin oldidan o‘zimizni muammolarimiz bor edi, ya’ni Firdavs Abdurahmonov ancha vaqt o‘ynamay, maydonga tushgandi, Oybek O‘rmonjonov ham uzoq muddatdan keyin safga qaytdi. Himoya chizig‘imizda ham muammolar bor edi. Hisobda oldinda edik, ammo oxirida himoyadagi e’tiborsizlik golga sabab bo‘ldi.

Guruhdan chiqish imkoniyati? Chindanam, hammasi endi bizning qo‘limizda emas. Endi so‘nggi turni kutamiz, hammasi oxirgi turda hal bo‘ladi.

Vadim Abramov so‘nggi o‘yinlarda juda asabiylashdi, sog‘lig‘idagi muammo sabab matbuot anjumanida o‘rniga men qatnashyapman.

Vazifa o‘zgarmaydi, muammo borligi ma’lum, o‘ynash kerak va guruhdan keyingi bosqichga chiqish kerak.

Tarkibimizdan ikki futbolchining JCH-2026ga borishi mumkinligi qolgan futbolchilarimizni albatta ruhlantiradi. Misol uchun, O‘rmonjonov va Abdurahmonov ham olimpiya jamoasiga chaqirilib kelmoqda, bu xursand qiladi, - deydi Marat Miftaxutdinov o‘yindan keyin.