«Manchester Siti» markaziy himoyachisi Yoshko Gvardiol boshqa top-klublar bilan bog‘lanmoqda. «Diario AS» nashrining xabariga ko‘ra, xorvatiyalik futbolchini sotib olish imkoniyati Madridning «Real» klubiga taklif etilgan.

Futbolchining vakillari «shaharliklar» safidagi unchalik omadli chiqmagan mavsumdan so‘ng, uni boshqa jamoaga joylashtirishga tayyor. Shuningdek, bosh murabbiy Xosep Gvardiolaning kelajagi borasidagi noaniqlik ham bu qarorga ta’sir ko‘rsatmoqda.

«Qaymoqranglilar» skautlari himoyachini u Angliyaga ko‘chib o‘tguniga qadar ham kuzatib kelishgan. Ispaniya grandi markaziy himoya chizig‘ini kuchaytirishga muhtoj, shu sababli kelayotgan transfer oynasida 24 yoshli futbolchi uchun kurashga kirishishi mumkin.

Gvardiolga, shuningdek, «Bavariya» ham qiziqish bildirmoqda. «Transfermarkt» saytida uning bozor qiymati 70 million yevroga baholangan.