«Manchester Siti» bosh murabbiyi Xosep Gvardiola jamoaning g‘alaba qozonish mentaliteti haqida gapirdi. Shanba kuni «shaharliklar» Angliya Kubogi finalida «Chelsi»ni mag‘lub etib (1:0), navbatdagi sovrinni qo‘lga kiritishdi.

«Buni shunday bo‘lishi kerak bo‘lgan oddiy holdek qabul qilmaslik lozim. Biz o‘zimizni o‘zgacha deb hisoblamaymiz. O‘zgachalik — biz haqimizda emas. Agar o‘zingni shunday deb hisoblay boshlasang, g‘alaba qozonishdan to‘xtaysan. Bizning kayfiyatimiz doim shunday bo‘lgan: «Yaxshi, biz buni uddaladik, endi oldinga intilamiz». Shu bilan birga, maqsadlarga erishish qanchalik qiyinligini doimo anglab yetganmiz», — deya Gvardiolaning so‘zlarini keltirmoqda City Report.

Ikki oydan kamroq vaqt oldin «Manchester Siti» Liga Kubogini ham qo‘lga kiritgan edi — o‘shanda finalda «Arsenal» mag‘lub etilgandi (2:0). Premyer-liga marrasiga ikki tur qolganida ham Gvardiola shogirdlari chempionlik uchun imkoniyatni saqlab turishibdi, biroq «kanonirlar»dan ikki ochkoga ortda qolmoqda.