«Манчестер Сити» бош мураббийи Хосеп Гвардиола жамоанинг ғалаба қозониш менталитети ҳақида гапирди. Шанба куни «шаҳарликлар» Англия Кубоги финалида «Челси»ни мағлуб этиб (1:0), навбатдаги совринни қўлга киритишди.

«Буни шундай бўлиши керак бўлган оддий ҳолдек қабул қилмаслик лозим. Биз ўзимизни ўзгача деб ҳисобламаймиз. Ўзгачалик — биз ҳақимизда эмас. Агар ўзингни шундай деб ҳисоблай бошласанг, ғалаба қозонишдан тўхтайсан. Бизнинг кайфиятимиз доим шундай бўлган: «Яхши, биз буни уддаладик, энди олдинга интиламиз». Шу билан бирга, мақсадларга эришиш қанчалик қийинлигини доимо англаб етганмиз», — дея Гвардиоланинг сўзларини келтирмоқда City Report.

Икки ойдан камроқ вақт олдин «Манчестер Сити» Лига Кубогини ҳам қўлга киритган эди — ўшанда финалда «Арсенал» мағлуб этилганди (2:0). Премьер-лига маррасига икки тур қолганида ҳам Гвардиола шогирдлари чемпионлик учун имкониятни сақлаб туришибди, бироқ «канонирлар»дан икки очкога ортда қолмоқда.