«Barselona» bosh murabbiyi Xans-Diter Flik klubda o‘zini qanday his qilayotgani haqida gapirdi. Germaniyalik mutaxassisning shartnomasi keyingi yilning o‘rtalarigacha mo‘ljallangan, biroq turli manbalarning allaqachon xabar berishicha, u yana bir yilga uzaytiriladi.
«Men «Barselona»da chin dildan baxtliman. Klub menga, shtabimga va futbolchilarga ishonch bildirmoqda. «Barsa»ning odamlar uchun qanchalik katta ahamiyatga ega ekanligi shunchaki aql bovar qilmas darajada. Bularning barchasi qalbdan chiqayotganini his qilish mumkin. Klub ham, shahar ham — bu yerda hamma narsa ajoyib», — dedi murabbiy mavsumning o‘z maydonidagi so‘nggi uchrashuvida «Betis» ustidan qozonilgan g‘alabadan (3:1) keyin o‘tkazilgan matbuot anjumanida.
Flik 2024 yilning yozidan beri o‘z lavozimida ishlab kelmoqda, uning boshqaruvida jamoa ikki mavsum ichida Ispaniya miqyosidagi 6 ta bo‘lishi mumkin bo‘lgan sovrinning 5 tasini qo‘lga kiritdi.
