Londonning «Chelsi» klubi yangi bosh murabbiyi Xabi Alonso jamoada masshtabli qayta qurishni boshlash arafasida. Ispaniyalik mutaxassis o‘ziga yaxshi tanish bo‘lgan xodimlardan iborat yangi murabbiylar shtabini shakllantirish niyatida. Bu haqda nufuzli talkSPORT nashri xabar bermoqda.
Manbaning bergan ma’lumotiga ko‘ra, Alonsoning shtabidan Madridning «Real» klubi tizimida u bilan birga faoliyat olib borgan bir qator mutaxassislar joy oladi. Ular orasida assistent Sebastyan Parrilya, murabbiylar Alberto Ensinas va Benyat Labayen, shuningdek, jismoniy tayyorgarlik bo‘yicha murabbiy Ismael Kamenforte Lopes bor.
Qayd etilishica, Parrilya Alonsoning uzoq yillik maslahatchisi hisoblanib, u bilan «Real» akademiyasidagi murabbiylik faoliyatining ilk kunlaridan buyon birga ishlab kelmoqda. Ensinas ilgari «Barselona» akademiyasida faoliyat yuritgan bo‘lsa, Labayen Madrid klubi tizimi va yoshlar jamoalarida tajriba to‘plagan.
Shu bilan birga, Xabi Alonso «Chelsi»ning amaldagi xodimlaridan bir qismini saqlab qolishni rejalashtirmoqda. Ular orasida vaqtinchalik bosh murabbiy Kalum Makfarleyn, standart vaziyatlar bo‘yicha murabbiy Bernardo Kueva va darvozabonlar murabbiyi Ben Roberts bor.
