Karlo Anchelotti o‘z qarorini qabul qildi. Braziliya terma jamoasining jahon chempionati uchun tarkibi e’lon qilindi. Ro‘yxatni ochiqlashdan oldin Anchelotti tanlov jarayoni juda murakkab kechganini ta’kidladi.
«26 nafar futbolchidan iborat tarkibni tanlash juda qiyin bo‘ldi. Raqobat darajasi juda yuqori. Avvalgi yig‘inlarga chaqirilgan ayrim futbolchilar hozir men nomlarini aytadigan tarkibdan norozi bo‘lishlari mumkin. Bundan juda-juda afsusdaman. Fantastik ishni amalga oshirgan barchaga katta rahmat.
Tarkib bo‘yicha menga juda ko‘p maslahatlar berildi: jurnalistlar, ekspertlar, blogerlar, xonandalar va sobiq futbolchilar tomonidan. Butun dunyoda hamma o‘z maslahatini berishga harakat qildi. Hatto samolyot uchuvchisi ham mendan kimni chaqirishimni so‘radi», — dedi Anchelotti matbuot anjumanida.
JCH-2026 guruh bosqichida Braziliya terma jamoasi Marokash, Gaiti va Shotlandiyaga qarshi bahs olib boradi.
