«Tottenxem» bosh murabbiyi Roberto De Dzerbi APL 37-turida «Chelsi»dan qabul qilib olingan mag‘lubiyat (1:2) haqida fikr bildirdi.
«Biz Tel orqali ilk xavfli vaziyatni yaratdik — Sanches ajoyib seyv namoyish etdi. Keyin esa chiroyli gol o‘tkazib yubordik, [Enso] Fernandes — katta futbolchi va biz bu vaziyatda yaxshiroq harakat qilishimiz mumkin edi. Ikkinchi golgacha o‘yinda qoldik, ammo ahmoqona gol o‘tkazib yubordik. Lekin bungacha Risharlison orqali juda yaxshi imkoniyatga ega bo‘lgandik. Menimcha, biz juda yaxshi o‘yin o‘tkazdik.
Biz yutqazdik. Hozir ushbu o‘yin haqida haddan tashqari ko‘p o‘ylaydigan vaqt emas. Keyingi uchrashuvga tayyorgarlik ko‘rishimiz kerak. O‘z stadionimizda, muxlislarimiz qarshisida o‘ynaymiz. Bor mahoratimiz, xarakterimiz, g‘urur va jasoratimiz bilan harakat qilishimiz shart. Ammo men ijobiy kayfiyatdaman, chunki bugun yomon o‘ynamadik», – dedi De Dzerbi Sky Sports'ga bergan intervyusida.
So‘nggi tur oldidan «Tottenxem» APL turnir jadvalida 17-o‘rinni egallab turibdi va xavfli zonadan atigi ikki ochko oldinda. 24 may kuni «shporlar» mavsumning yakuniy uchrashuvida «Everton»ga qarshi maydonga tushishadi.
