Londonning «Chelsi» klubi hujumchisi Liam Delap o‘zining «quruq» (golsiz) seriyasini uzaytirdi. 23 yoshli futbolchi «Tottenxem»ga qarshi uchrashuvda «ko‘klar»ning start tarkibida maydonga tushdi va jamoasining g‘alabasiga (2:1) hissa qo‘shdi, biroq raqib darvozasini yana ishg‘ol eta olmadi.
Hujumchining golsiz seriyasi barcha turnirlarni hisobga olganda allaqachon 25 ta o‘yinga yetdi.
Ingliz futbolchisi oxirgi marta bundan to‘rt oydan ko‘proq vaqt oldin — yanvar oyi boshida bo‘lib o‘tgan «Fulxem» bilan uchrashuvda raqib darvozasini ishg‘ol qilgan edi.
Liam Delap o‘tgan yilning yozida «Ipsvich» klubidan 35,5 million yevro evaziga «Chelsi»ga ko‘chib o‘tgandi. Ko‘plab mish-mishlarga ko‘ra, joriy mavsum futbolchi uchun londonliklar safidagi yagona mavsum bo‘lib qolishi mumkin. 24 may kuni «Chelsi» APLning so‘nggi turi doirasida safarda «Sanderlend»ga qarshi maydonga tushadi.
