«Barselona» yozda yana «1 ga 1» qoidasiga qaytadi — endilikda klub yangi futbolchilar uchun xuddi transferlardan qancha daromad topgan bo‘lsa, shuncha mablag‘ sarflash imkoniyatiga ega bo‘ladi.
La Liga direktori Xavyer Gomesning so‘zlariga ko‘ra, uchta muhim omil evaziga klubning ish haqi jamg‘armasi tarkib uchun belgilangan xarajatlar limitidan pastroq darajaga tushadi. Bular: VIP-lojalardan keladigan 70 million yevrodan sal ko‘proq miqdordagi daromad, «Kamp Nou» stadionida yangi tribunaning ochilishi hamda hujumchi Robert Levandovskining jamoadan ketishidir (bu «Barsa»ni uning katta miqdordagi maoshini to‘lash majburiyatidan xalos etadi).
Shuningdek, Gomes «blaugrana» uchun yangi homiylarni jalb etish imkoniyati borligini ham tilga oldi. Bu klub uchun yana bir daromad manbaiga aylanib, taqchillikni kamaytiradi va jamoaning odatiy tartibda faoliyat yuritishiga yo‘l ochadi.
Bundan tashqari, «Barselona» Ansu Fati uchun «Monako»dan 11 million yevro olishni mo‘ljallamoqda — ushbu mablag‘ o‘tgan mavsumni monegaskliklar safinda ijarada o‘tkazgan vingerni sotib olish huquqida ko‘zda tutilgan.
