O‘zbekiston milliy jamoasi bosh murabbiyi Fabio Kannavaro bo‘lajak jahon chempionati g‘olibligi uchun asosiy da’vogarlar haqida fikr bildirdi.

Jurnalistlar savollariga javob berar ekan, italiyalik mutaxassis Fransiya terma jamoasini asosiy favoritlardan biri sifatida ko‘rsatdi.

“Albatta, Fransiya. Menimcha, bu hozirgi kunda Yevropaning eng kuchli milliy jamoalaridan biri,” — dedi Kannavaro.

U shuningdek, O‘zbekiston bilan guruh bosqichida o‘ynaydigan Portugaliya terma jamoasini ham favoritlar qatoriga qo‘shdi.

“Yana Janubiy Amerika jamoalari bor, masalan Argentina va Braziliya — ular har doim chempionlik uchun asosiy da’vogarlardan. Shuningdek, men Angliyani ham qo‘shaman. Shuning uchun Jahon chempionati haqida gapirganda, biz doim aynan shu jamoalar haqida gapiramiz. Tarix, futbolchilar va ularning sifati tufayli”, — dedi murabbiy.

Taniqli sport nashri ESPN o‘z reytingida JCH-2026ning asosiy favoritlarini e’lon qildi. Unga ko‘ra, birinchi o‘rinni Ispaniya terma jamoasi egallagan. Ikkinchi o‘rin — Fransiya, uchinchi o‘rin — Argentina. Top-5 ga shuningdek Angliya va Braziliya ham kiritilgan.