«Yuventus» hujumchisi Dushan Vlaxovich yana bir top-klub — «Chelsi»ning radariga tushdi. 26 yoshli futbolchi tez orada erkin agentga aylanishi mumkin, chunki uning yakunlanib borayotgan shartnomasi haliyam uzaytirilgani yo‘q.
Transfer News Live nashrining Football Insiderga tayanib xabar berishicha, «ko‘klar» Vlaxovich nomzodini jiddiy ko‘rib chiqishmoqda. London klubi serbiyalik forvardni yozda jamoadan ketish ehtimoli juda yuqori bo‘lgan Liam Delapga munosib o‘rinbosar sifatida baholamoqda.
Dushan Vlaxovich joriy mavsumda «Yuventus» safida 22 ta uchrashuvda maydonga tushib, o‘z hisobiga 8 ta gol va 2 ta golli uzatmani yozdirib qo‘ydi. Hujumchi 2022 yilning boshidan buyon «keksa sinyora» sharafini himoya qilib kelmoqda.













