«Ювентус» ҳужумчиси Душан Влахович яна бир топ-клуб — «Челси»нинг радарига тушди. 26 ёшли футболчи тез орада эркин агентга айланиши мумкин, чунки унинг якунланиб бораётган шартномаси ҳалиям узайтирилгани йўқ.
Transfer News Live нашрининг Football Insiderга таяниб хабар беришича, «кўклар» Влахович номзодини жиддий кўриб чиқишмоқда. Лондон клуби сербиялик форвардни ёзда жамоадан кетиш эҳтимоли жуда юқори бўлган Лиам Делапга муносиб ўринбосар сифатида баҳоламоқда.
Душан Влахович жорий мавсумда «Ювентус» сафида 22 та учрашувда майдонга тушиб, ўз ҳисобига 8 та гол ва 2 та голли узатмани ёздириб қўйди. Ҳужумчи 2022 йилнинг бошидан буён «кекса синьора» шарафини ҳимоя қилиб келмоқда.
