Madridning «Real» klubi sobiq bosh murabbiyi, ayni paytda Braziliya terma jamoasini boshqarayotgan Karlo Anchelotti «qaymoqranglilar» sardori Daniel Karvaxal haqida iliq fikrlar bildirdi.
34 yoshli qanot himoyachisi joriy mavsum yakunida «qirollik klubi»ni tark etadi. La Liga 38-turi doirasida bugun bo‘lib o‘tadigan «Atletik» Bilbaoga qarshi uchrashuv ispaniyalik futbolchi uchun «Real» libosidagi so‘nggisi bo‘ladi.
«Karvaxal — professionallikning va «Real»da o‘ynash uchun zarur bo‘lgan barcha fazilatlarning mukammal timsoli. U o‘z mahorati, sadoqati va eng muhimi, qadriyatlari tufayli porloq faoliyatni ortda qoldirdi. U bilan yillar davomida birga ishlaganimdan faxrlanaman», — deya Anchelottining so‘zlarini keltiradi Madrid Universal.
Daniel Karvaxal madridliklar safida barcha turnirlar doirasida jami 450 ta o‘yin o‘tkazgan.
