«Manchester Siti» himoyachisi Niko O’Rayli Angliya Premyer-ligasida mavsumning eng yaxshi yosh futbolchisi deb topildi. Bu haqda musobaqa matbuot xizmati xabar berdi.

21 yoshli himoyachi joriy mavsumning haqiqiy kashfiyotlaridan biriga aylandi. O’Rayli chempionat doirasida 34 ta o‘yinda maydonga tushib, 5 ta gol urdi va 3 ta golli uzatmaga mualliflik qildi. Uning «Manchester Siti» bilan tuzgan shartnomasi 2030 yilga qadar mo‘ljallangan, Transfermarkt portali esa futbolchining transfer qiymatini 50 million yevroga baholamoqda.

Ta’kidlash joizki, «Manchester Siti» ayni damda 78 ochko bilan Angliya chempionatida ikkinchi o‘rinda bormoqda. Musobaqa yakunlanishiga bir tur qolganda, «shaharliklar» 24 may kuni o‘z maydonlarida «Aston Villa»ni qabul qilishadi.