«Manchester Yunayted»ning sobiq himoyachisi Patris Evra ayni damda «Barselona»da ijara asosida to‘p surayotgan hujumchi Markus Reshfordning kelajagi borasida o‘z fikrlarini bildirdi. Evraning ta’kidlashicha, futbolchi «Old Trafford»ga qaytmagani ma’qul.
«Shaxsiy va egoistik nuqtai nazardan aytsam, «Manchester Yunayted»ga qaytma. Qayerda baxtli bo‘lsang, o‘sha yerda qol. Markusning narxi «Barselona» uchun juda arzon bo‘ladi va bu ular uchun ayni muddao, chunki klub uning haqiqiy qiymatidan kamroq pul to‘laydi», — deya Evraning so‘zlarini keltiradi Manchester United Forever.
Joriy mavsumda Markus Reshford «Barselona» tarkibida barcha turnirlarda 48 ta uchrashuvda maydonga tushib, 14 ta gol va 14 ta golli uzatmani amalga oshirdi. Uning «Manchester Yunayted» bilan tuzgan amaldagi shartnomasi 2028 yilning 30 iyuniga qadar mo‘ljallangan. Transfermarkt portali futbolchining transfer qiymatini 40 million yevroga baholamoqda.
