«Liverpul» va Angliya terma jamoasining sobiq hujumchisi Maykl Ouen «qizillar»da kechayotgan hozirgi vaziyatni tanqidiy baholadi. Ouenning so‘zlariga ko‘ra, jamoa o‘z darajasidan past o‘yin ko‘rsatmoqda va yozgi transferlar oynasida jiddiy o‘zgarishlarga muhtoj.
Tribal Football nashri Flashscore'ga tayanib xabar berishicha, Ouen jamoa bosh murabbiyi Arne Slotga bo‘lgan ishonchning kamayib borayotganiga e’tibor qaratgan:
«Liverpul» muxlislari o‘z murabbiyini tanqid qilishlari juda kam uchraydigan holat, ammo hozir ko‘pchilik o‘zgarishlar tarafdori. Slotga 2024/2025 yilgi mavsumdagi chempionlik va Chempionlar ligasiga yo‘llanma uchun tashakkur aytish mumkin, ammo «Liverpul» uchun bu yetarli emas. Menimcha, u keyingi mavsumni boshlaydi, lekin dastlabki 10 ta o‘yinda natijalar yomon bo‘lsa, unga nisbatan bosim misli ko‘rilmagan darajaga yetadi», — dedi Ouen.
Sobiq futbolchi jamoadagi pasayishga bir qator omillar sabab bo‘lganini qayd etdi: «Diogu Jotaning yo‘qotilishi jamoaga katta ta’sir qildi. Bir qator muhim o‘yinchilar ketdi, jamoa tuzilmasi o‘zgardi, bunga jarohatlar va yangi o‘yinchilarning moslashish muammolarini qo‘shsangiz, natija ayon bo‘ladi. Hech kimni ayblash kerak emas, ammo jamoa o‘z darajasidan past o‘ynamoqda. Yozda «Liverpul»ga o‘z mavqeini qaytarib olishi uchun jiddiy qayta qurish talab etiladi».
