«Ливерпуль» ва Англия терма жамоасининг собиқ ҳужумчиси Майкл Оуэн «қизиллар»да кечаётган ҳозирги вазиятни танқидий баҳолади. Оуэннинг сўзларига кўра, жамоа ўз даражасидан паст ўйин кўрсатмоқда ва ёзги трансферлар ойнасида жиддий ўзгаришларга муҳтож.
Tribal Football нашри Flashscore'га таяниб хабар беришича, Оуэн жамоа бош мураббийи Арне Слотга бўлган ишончнинг камайиб бораётганига эътибор қаратган:
«Ливерпуль» мухлислари ўз мураббийини танқид қилишлари жуда кам учрайдиган ҳолат, аммо ҳозир кўпчилик ўзгаришлар тарафдори. Слотга 2024/2025 йилги мавсумдаги чемпионлик ва Чемпионлар лигасига йўлланма учун ташаккур айтиш мумкин, аммо «Ливерпуль» учун бу етарли эмас. Менимча, у кейинги мавсумни бошлайди, лекин дастлабки 10 та ўйинда натижалар ёмон бўлса, унга нисбатан босим мисли кўрилмаган даражага етади», — деди Оуэн.
Собиқ футболчи жамоадаги пасайишга бир қатор омиллар сабаб бўлганини қайд этди: «Диогу Жотанинг йўқотилиши жамоага катта таъсир қилди. Бир қатор муҳим ўйинчилар кетди, жамоа тузилмаси ўзгарди, бунга жароҳатлар ва янги ўйинчиларнинг мослашиш муаммоларини қўшсангиз, натижа аён бўлади. Ҳеч кимни айблаш керак эмас, аммо жамоа ўз даражасидан паст ўйнамоқда. Ёзда «Ливерпуль»га ўз мавқеини қайтариб олиши учун жиддий қайта қуриш талаб этилади».
