«Yuventus» A Seriyaning so‘nggi tur doirasidagi «Torino»ga qarshi derbida g‘alabani qo‘ldan chiqardi (2:2). «Byankonerilar» Dushan Vlaxovichning dubli evaziga 2:0 hisobida oldinga chiqib olgan bo‘lsa-da, mezbonlar hisobni tenglashtirishga muvaffaq bo‘lishdi.

Luchano Spalletti boshchiligidagi jamoa Chempionlar ligasi zonasidan tashqarida — turnir jadvalida atigi oltinchi o‘rinda mavsumni yakunladi. Jurnalistlar «keksa sinyora» ustozidan jamoa kelgusi mavsumda chempionlik uchun kurasha oladimi, deb so‘rashdi.

«Bu barcha kutayotgan narsa. Bizning zimmamizda majburiyat bor — biz istalgan raqib bilan kurashishga, doimo g‘alaba uchun o‘ynashga va yuqori o‘rinlarga da’vogarlik qilishga qodir bo‘lishimiz kerak. Biz eng ulkan maqsadlarni hal qila oladigan jamoani shakllantirishimiz zarur», – dedi 67 yoshli mutaxassis o‘yindan keyingi intervyusida.

Luchano Spalletti mazkur lavozimni o‘tgan yilning kuzida, ishdan bo‘shatilgan Igor Tudorning o‘rniga egallagan edi.