«PSJ» hujumkor yarim himoyachisi Xvicha Kvarasxeliya o‘z o‘yinining qaysi jihatini yaxshilash istagi borligi haqidagi savolga javob berdi. Gruziyalik futbolchi aniq bir jihatni ko‘rsatmadi, biroq futbolchilar doimo rivojlanishga intilishi kerakligini ta’kidladi.

«Menimcha, har bir o‘yinchi nimanidir yaxshilashi mumkin va men bundan mustasno emasman. Men doimo o‘sishga, ko‘proq gol urishga va golli uzatmalar berishga harakat qilaman, lekin men uchun futbol — bu faqat gollar va assistlardan iborat emas. Jamoaga qay tarzda yordam berishing muhimroq.

Ba’zida sen gol urolmasliging yoki pas berolmasliging mumkin, lekin jamoang g‘alaba qozonishi uchun maydonda bor kuchingni bera olasan. Men uchun eng muhimi shu. O‘yin tugaganida, men o‘z jamoam uchun 100 foiz kuchimni berganimni va g‘alabaga hissa qo‘shganimni bilishni istayman», — deya Kvarasxeliyaning so‘zlarini keltirmoqda «PSJ» rasmiy sayti.

2025/2026 yilgi mavsumda Xvicha Kvarasxeliya 47 ta o‘yinda maydonga tushib, o‘z hisobiga 19 ta gol va 10 ta golli uzatmani yozdirib qo‘ydi.